ភ្នំពេញ៖ ភ្ញៀវទេសចរបរទេសចំនួនជាង ៣៥ម៉ឺនាក់ បានទិញសំបុត្រចូលទស្សនារមណីយដ្ឋានអង្គរ ដែលទទួលបានចំណូលចំនួនជាង ១៧ លានដុល្លារអាម៉េរិក ក្នុងរយៈពេល ៥ខែដើមឆ្នាំ២០២៦ ថយចុះ ២៩,៩៨ % បើធៀបនឹងរយៈពេលដូចគ្នាកាលពីឆ្នាំ២០២៥។
សេចក្តីប្រកាសព័ត៌មានរបស់គ្រឹះស្ថានអង្គរ ចេញផ្សាយនៅថ្ងៃទី១ ខែមិថុនា បានឱ្យដឹងថា ចាប់ពីខែមករា ដល់ខែឧសភា ឆ្នាំ២០២៦ មានភ្ញៀវទេសចរបរទេសចំនួន ៣៥៩ ៤៧១ នាក់ (ធ្លាក់ចុះ ៣១,៨៦%) បានទិញសំបុត្រចូលទស្សនារមណីយដ្ឋានអង្គរ និងរកប្រាក់ចំណូលបានចំនួន ១៧ ២០៤ ៣២២ ដុល្លារអាម៉េរិក ធ្លាក់ចុះ ២៩,៩៨ % បើធៀបនឹងរយៈពេលដូចគ្នាកាលពីឆ្នាំ២០២៥។
គ្រឹះស្ថានអង្គរ គឺជាគ្រឹះស្ថានសាធារណៈរដ្ឋបាលដែលត្រូវបង្កើតឡើងកាលពីឆ្នាំ២០១៦ ដោយស្ថិតក្រោមអាណាព្យាបាលបច្ចេកទេសនៃក្រសួងទេសចរណ៍ និងស្ថិតក្រោមអាណាព្យាបាលហិរញ្ញវត្ថុ នៃក្រសួងសេដ្ឋកិច្ច និងហិរញ្ញវត្ថុ។ ការប្រមូលចំណូលរបស់គ្រឹះស្ថានអង្គរ គឺរួមមាន រមណីយដ្ឋានអង្គរ, ប្រាសាទកោះកែរ, និងសំបុត្រទូកនៅកំពង់ផែចុងឃ្នៀស។ សម្រាប់តម្លៃតម្លៃសំបុត្រចូលទស្សនារមណីយដ្ឋានអង្គរ ត្រូវបានចែកចេញជា ៣ប្រភេទ គឺសំបុត្រចូលទស្សនា ១ថ្ងៃមានតម្លៃ ៣៧ដុល្លារ, រយៈពេល ៣ថ្ងៃតម្លៃ ៦២ដុល្លារ និង ៧ថ្ងៃ មានតម្លៃ ៧២ដុល្លារ។
សូមបញ្ជាក់ថា ក្នុងឆ្នាំ២០២៥កន្លងទៅ មានភ្ញៀវទេសចរអន្តរជាតិ ៩៥៥ ១៣១ នាក់បានទិញសំបុត្រចូលទស្សនារមណីយដ្ឋានអង្គរ ដែលធ្វើឱ្យអង្គភាពមួយនេះប្រមូលប្រាក់បាន ៤៤,៧១ លានដុល្លារអាម៉េរិក។ បើធៀបនឹងឆ្នាំ២០២៤ គឺចំនួនភ្ញៀវទិញសំបុត្រ បានធ្លាក់ចុះ ៦,៧% និង ប្រាក់ពីការលក់សំបុត្រធ្លាក់ចុះ ៦,៥១%។